БиХ е меѓу шесте нации кои се во различни фази од пристапувањето во ЕУ. Од војната на Русија со Украина, претставниците на ЕУ се обидуваат да ги оттргнат од руското влијание.
Европската комисија ќе му препорача на Советот на Европската унија да ги започне пристапните преговори со Босна и Херцеговина, објави претседателката на Европската комисија Урсула фон дер Лајен.
„Денес ќе одлучиме да му препорачаме на Советот да ги отвори пристапните преговори со Босна и Херцеговина“, рече таа во говорот пред Европскиот парламент.
Најавата значи дека извршната власт на ЕУ е задоволна од Босна и дека земјата ги исполнила критериумите за да започне формални разговори за пристапување во ЕУ.
„Босна сега е целосно усогласена со нашата надворешна и безбедносна политика, што е клучно во овие времиња на геополитички превирања“, рече претседателката на Комисијата.
Фон дер Лајен рече дека комисијата ќе објави извештај за напредокот во кој ќе биде опишано како Босна ги исполнила тие услови.
Сепак, на одлуката за почеток на разговорите треба едногласна согласност од лидерите на 27-те земји-членки на ЕУ, претставени во Европскиот совет.
Босна поднесе барање за пристап во ЕУ во 2016 година и Советот ја призна како формален кандидат за членство во 2022 година. Во ноември минатата година, Комисијата рече дека преговорите за пристап треба да започнат откако земјата ќе исполни одредени критериуми.
